Munir Niazi

Nazam - Saray Asmaan Par Badal Chaye Hein

سارے آسمان پر بادل چھائے ہیں

مجھے اپنا گھر بھول گیا ہے

میں گھر سے باہر ضرورت کی کوئی چیز لینے کے لیے نکلا تھا

گھر سے باہر نکلنے کے بعد مجھے اپنا گھر بھول گیاہے

اب میں اسے تلاش کررہا ہوں

اسے کیسے تلاش کروں

اکّا دکّا کوئی درخت ،

کبھی کبھی ، کہیں کہیں کو شناسا چہرہ،

اور دور دراز میں کہیں کوئی مانوس عمارت _______

سمجھ میں نہیں آتا

ایسے نامکمل نشانوں کی معرفت اپنے گھر تک کیسے پہنچوں گا

میرے آس پاس خواب کی کیفیت ہے

اور میرا دل گھر واپس جانے کو چاہتا ہے